PAKIGKOLUKABILDO SA BATID NGA MANGUNGULIT NGA BISAYA

Renil Bandiez Oliva

Simple ug hilumon apan mapasigarbuhon, inila ug bantugan apan kalmado ug pinahiluna ang mga binuhiang mga pulong. Sama niini mahulagway ang usa ka inilang mangungulit sa atong panahon nga si JET Florendo sa dihang nakighinabi sa iyang mga dumadayeg sa produkto sa iyang dili matukib nga imahinasyon nga mao ang mga kinulit sa iyang mga kamot.

Sama sa uban, adunay lahi nga kasaysayan sa kinabuhi si JET Florendo, bunga sa iyang pasyon sa mga arte sa dekada 70 diin nahikuyog sa mga radikal nga grupo sa kabatan-unan sa nailang “first quarter storm movement o unang kwarto sa hapak sa unos”. Nakulit usab ang iyang kaugalingon isip artista nga naghulagway sa iyang lawom nga pagbati nga dili yanong masabtan sa uban. Sa tinuod pipila lang kanato ang lawom nga modayeg sa sama niini nga mga arte. Ang nangunang rekisitos sa pagdayeg mao ang atong pagka able sa panghuna-huna.

Niini nga mga punto makaingon ako nga ang kinulit ni Jet Florendo “abstrakto” diin taas ang pangihanglan sa kaablihon sa mga panghuna-huna sa mga mangsaksihay sa iyang mga pasundayag sa arte nga kinulit sa kamot. Ug sa ingon niini nga basehanan mahulagway nato nga kadaghanan sa mga artistang mangungulit wala mamahimong adunahan sa salapi apan adunahan sa pasyon sa arte.

Ang pagkamahilumon ni Jet Florendo sama ka lawom huna-hunaon sa hulagway sa iyang mga produkto nga kinulit sa kamot. Usa sa subo nga puy-an sa kamatuoran nga gitakda na sa pangkalibutanong kasaysayan nga pipila ug nihit sa mga artistang mangungulit mosikat samtang buhi pa. Sama sa uban nga mga bangiitan ug batid sa sama niini nga arte sa tibuok kalibutan nga ang ilang binuhat nisikat huaman sa katuigan sa ilang pagpanaw.

Bisan ang iyang tubag sa pangutanang unsa ang iyang pinaka kinaham nga obra? Mapasigarbuhon niyang gibuksas kanamo nga iyang perpektong obra maestro mao ang iyang duha ka anak diin gikulit kini sa ilang tim-os nga paghinigugmaay sa iyang pinalanggang asawa.

Saksihan ug suportahan nato ang mga lain-laing nataran sa arte nga naghulagway sa kulturang Pilipino. Sama ni Jet Florendo nga nitampo sa maong kultura nga angayang ipasigarbo sa tibuok kalibutan.

Inyong makita ang iyang pasundayag sa mga kinulit sa kamot sugod niadtong 8-8-8 diha sa Maribago Blue Water Gallery, Lapu-lapu City. Mabuhi ang mga artistang Pilipino.